Еврокубокларда АПЛ клублари қийналди: фақат битта клубда ғалаба...
Европа клуб мусобақаларида навбатдаги ҳафта Англия клублари учун омадли кечмади. Қитъанинг энг нуфузли турнирларида — UEFA Champions League, UEFA Europa League ва UEFA Europa Conference League'да иштирок этган Premier League'нинг тўққизта клуби майдонга тушди. Бироқ қизиқ жиҳати шундаки, ушбу учрашувларда улардан фақат биттаси ғалаба қозонишга муваффақ бўлди.
Ягона муваффақият Европа Лигасида иштирок этаётган "Aston Villa" ҳисобига ёзилди. Бирмингемликлар Франциядаги баҳсда "Lille OSC"ни 1:0 ҳисобида мағлуб этиб, жавоб ўйини олдидан муҳим устунликни қўлга киритди.
Бошқа клублар учун эса натижалар анча мураккаб бўлди. "Nottingham Forest" Европа Лигаси доирасида ўз майдонида FC "Midtjylland"га 0:1 ҳисобида имкониятни бой берди. "Crystal Palace" эса Конференциялар Лигасида Кипрнинг AEK "Larnaca" клуби билан 0:0 ҳисобида дуранг қайд этди.
Чемпионлар Лигасидаги натижалар эса англиялик мухлислар учун янада оғир кечди. Сешанба кунги учрашувда "Tottenham Hotspur" Испаниянинг "Atletico Madrid" клубига 2:5 ҳисобида мағлуб бўлди. "Liverpool" FC Туркиянинг "Galatasarоy" жамоасига 0:1 ҳисобида ютқазди. "Newcastle United" эса Испания гранди FC "Barcelona" билан 1:1 ҳисобида дуранг ўйнади.
Чоршанба кунги баҳслар ҳам сенсацион натижаларга бой бўлди. "Manchester City" ўз майдонида Испаниянинг машҳур клуби "Real Madrid"дан 0:3 ҳисобида йирик мағлубият қабул қилди. "Chelsea" FC Франциянинг "Paris Saint-Germain" жамоасига 2:5 ҳисобида ютқазди. Шу билан бирга "Arsenal" FC Германиянинг "Bayer Leverkusen" клубини енга олмай, 1:1 ҳисобида дуранг қайд этди.
Шу тариқа, Еврокубоклар ҳафтаси Англия клублари учун кутилгандан анча оғир ўтди. Тўққиз жамоадан фақат биттасининг ғалаба қозонгани мухлислар орасида катта муҳокамаларга сабаб бўлмоқда. Энди барча эътибор жавоб учрашувларига қаратилган бўлиб, АПЛ вакиллари вазиятни тўғрилаб, кейинги босқич учун курашни давом эттиришга ҳаракат қилади.