“Супер олтин тўп” қачон топширилиши маълум бўлди

“France Football” таҳририяти футбол оламидаги энг ноёб совринлардан бири ҳисобланган “Супер олтин тўп” мукофотини қайта жорий этиш масаласини муҳокама қилаётгани айтилмоқда. Бу ҳақда “The Touchline” портали хабар тарқатди.

Маълум қилинишича, ушбу соврин илк бор топширилганидан роппа-роса 40 йил ўтгач, яъни 2029 йилда яна тақдим этилиши режалаштирилган. Бу эса футбол мухлислари учун жуда катта қизиқиш уйғотиши тайин.

Айтилишича, мукофот сўнгги 30 йилнинг энг яхши футболчисига берилади. 1980 йиллар охирида кузатилган тартиб каби, бу сафар ҳам номзодлар “Олтин тўп”ни бир неча марта қўлга киритган футболчилар орасидан саралаб олинади.

Тарихга назар ташласак, ҳозиргача ягона “Супер олтин тўп” 1989 йилда Альфредо Ди Стефанога берилган. Ўшанда “Реал Мадрид”нинг буюк афсонаси овоз бериш жараёнида Йохан Кройф ва Мишель Платини каби юлдузларни ортда қолдирган эди.

Қизиғи шундаки, 2021 йилга қадар ушбу бетакрор соврин “Сантьяго Бернабеу” стадионида жойлашган клуб музейида сақланган. Кейинроқ эса у кимошди савдосига қўйилиб, 187 минг фунт стерлингга сотилган.

Агар “Супер олтин тўп” 2029 йилда яна топшириладиган бўлса, футбол жамоатчилиги сўнгги ўттиз йилнинг энг буюк ўйинчисини аниқлаш учун турли давр ва турли авлод юлдузларини яна бир бор таққослаш имкониятига эга бўлади. Бу эса нафақат баҳсларга, балки катта қизиқиш ва муҳокамаларга ҳам сабаб бўлиши мумкин.