«Насаф» ва «Сўғдиёна» уй учрашувларини бошқа шаҳарларда ўтказади
Ўзбекистон Суперлигасининг 4-тур доирасидаги муҳим учрашувлар ўтказиладиган манзиллар бўйича ўзгаришлар рўй берди. Хусусан, "Nasaf" клуби ўзининг уй учрашувини Ғузордаги "Markaziy" стадионида ўтказа олмаслиги маълум бўлди. Бунга сабаб сифатида стадионнинг ҳозирги ҳолати Суперлига талабларига тўлиқ жавоб бермаслиги кўрсатилган. Шу боис, қаршиликлар 20 март куни бўлиб ўтадиган "Surxon"га қарши баҳсни Самарқанд шаҳридаги "Dinamo" стадионида ўтказишга қарор қилди ва бу борада Лига раҳбариятини расман хабардор қилди.
Шунингдек, Жиззахнинг "Сўғдиёна" клуби ҳам ўз уй учрашувларини ўтказишда қийинчиликларга дуч келди. Жамоа дастлаб ўйинларни Зоминдаги стадионда ўтказишни режалаштирган эди, бироқ айни дамда ушбу спорт иншоотида таъмирлаш ва талаб даражасига келтириш ишлари олиб борилмоқда. Шу сабабли, "Сўғдиёна" клуби "Paxtakor"га қарши 4-тур учрашувини Тошкентдаги "Paxtakor" стадионида ўтказиш учун Лига ташкилотига мурожаат йўллади.
Ушбу ўзгаришларга кўра, "Сўғдиёна" ва "Paxtakor" жамоалари ўртасидаги баҳс 20 март куни белгиланган муддатда бўлиб ўтади. Гарчи ўйин пойтахтда ўтказилса-да, "Сўғдиёна" клуби ушбу учрашувда расман мезбон мақомида ҳаракат қилади. Шунингдек, келишувга биноан, жамоаларнинг иккинчи даврадаги ўзаро тўқнашуви ҳам "Paxtakor" стадионида бўлиб ўтади ва унда "Paxtakor" клуби ўз уйида мезбонлик қилади. Футбол жамоаларининг стадионлар билан боғлиқ бундай вақтинчалик ўзгаришлари чемпионатнинг сифатли ва хавфсиз ўтишини таъминлаш мақсадида амалга оширилмоқда.