Роналдунинг жароҳати ҳақида янги маълумотлар тарқалди
«Ал-Наср» ҳужумчиси Криштиану Роналду шанба куни «Ал-Фейҳа»га қарши ўйинда жароҳат сабаб майдонни эрта тарк этди. Бу ҳақда euro-football.ru хабар беради.
Учрашув 3:1 ҳисобида якунланди. 41 ёшли португалиялик юлдуз бу сафар гол ура олмади ва 11-дақиқада пенальтидан ҳам фойдалана билмади. Баҳс якунига яқин эса мураббийлар штаби уни мажбуран алмаштирди.
Al Nassr Zone манбасининг саудиялик ОАВга таяниб хабар беришича, Роналдуда сон орқа мушаги (ҳамстринг) шикастланган. Агар оддий чўзилиш бўлса, тикланиш 3–5 кунни олиши мумкин. Энг ёмон ҳолатда мушакда узилиш аниқланса, футболчи икки ҳафта ёки ундан кўпроқ муддат майдонга туша олмаслиги эҳтимоли бор.
Жорий Саудия Арабистони чемпионати мавсумида Роналду 22 ўйинда 21 та гол муаллифи бўлиб турибди.