Роналду пеналтдан фойдалана олмади, «Ал-Наср» қийналиб ютди

Саудия Арабистони чемпионатининг шанба кунги учрашувида «Ал-Фейҳа» ўз майдонида «Ал-Наср»ни қабул қилди. Турнир пешқадами бўлган меҳмонлар кўплаб ноқулай вазиятларга қарамай, охир-оқибат 3:1 ҳисобида ғалаба қозониб, очколарни бой бериб қўйишга сал қолди. Бу ҳақда euro-football.ru хабар беради.

Ўйин бошида Криштиану Роналду пеналтини аниқ ижро эта олмади: унинг пастдан йўллаган зарбаси чап устунга тегиб, майдон ташқарисига чиқиб кетди. Биринчи бўлим якунида эса «Ал-Наср» ўз дарвозасига гол ўтказиб қўйди: Раккан Каабининг ўнг қанотдан узатмасини дарвозабон ушлашга чиқди, аммо жамоадоши Абдуллела ал-Амри тўпни оёғи билан яқин бурчакка йўналтириб юборди — 1:0.

Иккинчи бўлимда «Ал-Наср» босимни кучайтирди. Жоау Фелишнинг жарима майдонидан йўллаган зарбасини ҳимоячилар тўсди, қайтган тўпга Роналду 15 метрлар атрофидан кучли зарба берди, бироқ дарвозабон сейв қайд этди.

72-дақиқада ҳисоб тенглашди: Султон ал-Ганам ўнг қанотдан олдинга узоқ пас ташлади, Кингсли Коман жарима майдонига ёриб кириб, узоқ устун томон узатма берди ва Садио Мане тўсиқсиз зарба бериб, гол урди — 1:1.

Шундан кейин ҳам вазиятлар кетма-кет давом этди: Марсело Брозович ҳамкорини дарвозабон билан яккама-якка чиқарди, аммо Айман Яҳё имкониятдан фойдалана олмади. Брозовичнинг навбатдаги узатмасидан кейин Коман узоқ бурчакка йўллаган зарбасини дарвозабон сакраб қайтарди.

80-дақиқада «Ал-Наср» олдинга чиқиб олди: Брозович бурчакдан тўп узатди, у Фелишга етиб борди ва португалиялик 20 метрлар атрофидан яқин устунга зарба берди. Тўп устундан қайтиб, дарвозабоннинг орқасига тегди-да, чизиқдан ўтиб кетди — 1:2.

Учрашув якунида меҳмонлар устунлигини мустаҳкамлади. Фелиш билан чап қанотда тезкор комбинация уюштирилгач, ҳал қилувчи зарбани саккиз метрлар атрофидан Абдулла ал-Ҳамдан йўллади — 1:3.

Натижада «Ал-Фейҳа» турнир жадвалида 11-ўринни бўлишиб турибди, «Ал-Наср» эса энг яқин таъқибчисидан икки очколик фарқ билан пешқадамликни сақлаб қолди.