«Интер» футболчиси ижара даврида оғир жароҳат олди
Миланнинг «Интер» клубидан «Расинг Авельянеда»га ижарага ўтган ҳужумкор ярим ҳимоячи Валентин Карбони узоқ муддат сафдан чиқди. Бу ҳақда euro-football.ru хабар беради.
Аргентина ОАВ хабарига кўра, 20 ёшли футболчининг тиззасидаги олдинги хочсимон боғлам узилгани аниқланган. Унинг тўлиқ тикланиши 6–8 ойга чўзилиши кутилмоқда.
«Расинг» Карбонини январ ойида «Интер»дан ижарага олган ва келишув жорий йил декабр охиригача мўлжалланган. Мавсумнинг илк ярмида у «Женоа» сафида 15 учрашувда майдонга тушиб, 1 гол урган. Истеъдодли аргентиналикнинг «нерадзуррилар» билан амалдаги шартномаси 2029 йил ўрталаригача давом этади.