Губерниев Россия тез орада Англия ва Аргентина билан ўйнамайди деди
Спорт шарҳловчиси Дмитрий Губерниев Россия терма жамоасининг март ойидаги йиғинга рақиблар эълон қилингани юзасидан фикр билдирди. Валерий Карпин бошчилигидаги жамоа келаси ой Никарагуа (27 март) ҳамда Мали (31 март)га қарши ўртоқлик учрашувларини ўтказади. Бу ҳақда euro-football.ru хабар беради.
Губерниевнинг таъкидлашича, яқин келажакда Россия Англия ёки Аргентина каби грандлар билан майдонга тушиши қийин. “Биз биз билан ўйнашга рози бўлган рақибларга қарши ўйнаймиз. Мали ва Никарагуага раҳмат”, — дея унинг сўзларини Metaratings келтирди.
Шунингдек, у Никарагуа ва Мали билан бўладиган ўйинлар ҳам мухлислар эътиборини тортишини айтди.
Эслатиб ўтамиз, Россия — Никарагуа учрашуви Краснодарда, Мали билан баҳс эса Санкт-Петербургда бўлиб ўтади.