Пашалич «Аталанта» ўйини клуб тарихида қолишини айтди
Хорватиялик ҳужумчи Марио Пашалич Дортмунднинг «Боруссия»сига қарши учрашувда «Аталанта» сафида энг кўзга кўринган футболчилардан бири бўлди. Беллашувдан сўнг у бу ўйин Бергамо клуби тарихида алоҳида ўрин эгаллашига ишонч билдирди. Бу ҳақда euro-football.ru хабар беради.
«Бу Европадаги энг яхши ўйинларимиздан бири бўлди, айниқса иккинчи бўлимда. Ҳозирги лаҳзадан завқланяпмиз. Айнан шундай баҳслар клуб тарихини ёзади. Ишонаманки, бутун мавсум ҳам биз учун яхши, балки тарихий мавсум сифатида эсда қолади», — дея Пашаличнинг сўзларини келтиради calcioatalanta.it.
«Аталанта» Чемпионлар лигасидаги навбатдаги рақибини жума куни билиб олади.