Сафонов ПСЖ ғалабасидан сўнг яна пешқадамликка қайтди
ПСЖ дарвозабони Матвей Сафонов 23-тур доирасида «Мец»га қарши ўйиндан кейин фикр билдирди. Париж клуби ушбу учрашувда 3:0 ҳисобида ишончли зафар қучди. Бу ҳақда euro-football.ru хабар беради.
Сафонов ижтимоий тармоқлардаги постида жамоа яна турнир жадвалида биринчи ўринга қайтганини таъкидлади. Унинг сўзларига кўра, ПСЖ ўйинни назорат остида ўтказди ва рақиб деярли хавфли вазият ярата олмади: «Агар адашмасам, рақибнинг дарвоза томон бирорта ҳам аниқ зарбаси бўлмади. Бу эса рақибнинг жадвалдаги ўрнидан қатъи назар, ҳар бир ўйинга масъулият билан ёндашаётганимизни кўрсатади», — деди у.
Жорий мавсумда 26 ёшли россиялик посбон 10 учрашувда майдонга тушди, 10 та гол ўтказиб юборди. Сафонов 4 марта дарвозасини дахлсиз сақлаб қолди.
Бу ғалабадан кейин ПСЖ ҳисобида 54 очко жам бўлди. Парижликлар «Ланс»нинг «Монако»га ютқазиб, иккинчи поғонага тушиб кетганидан унумли фойдаланиб, яна пешқадамликни қўлга олди.