Анри «Барселона»даги асосий муаммони айтди ва уч номни санади

«Барселона»нинг собиқ футболчиси Тйерри Анри каталонияликлар ўйинидаги энг катта камчилик нимада эканини таъкидлади. Француз мутахассиси фикрича, жамоага вазиятлардан унумли фойдаланишни кескин оширадиган юқори даражадаги марказий ҳужумчи етишмаяпти. Бу ҳақда euro-football.ru хабар беради.

Анрининг айтишича, «Барселона»га ҳақиқий «тўққизлик» — ўзини исботлаган, барқарор гол урадиган форвард керак. У мисол сифатида Виктор Осимҳен, Эрлинг Холанн ёки Гарри Кейн каби ҳужумчиларни тилга олди. «Sport» нашри келтирган иқтибосда Анри «умидли» ижрочилардан кўра, тайёр гол машиналари зарурлигини урғулаган.

Француз афсонаси Ламин Ямал каби иқтидорли футболчи бор пайтда унинг узатмаларидан гол уриш осонроқ бўлиши кераклигини ҳам қўшимча қилди. Анрининг фикрича, юқори даражада баъзан битта имкониятнинг ўзи етарли бўлади, бироқ «Барселона» айрим ўйинларда жуда кўп вазиятни бой бермоқда ва бу клуб даражасига тўғри келмайди.

Ҳозирда «Барселона» Ла Лига жадвалида иккинчи ўринда бормоқда ва пешқадам «Реал»дан икки очко ортда қолган.