«Қизилқум» U-19 клуби бош мураббийи пора олаётганда қўлга олинди

«Қизилқум» U-19 клуби бош мураббийи ёш ўсмирни асосий таркибга киришига кафолат учун пора олаётганда қўлга олинди. Бу ҳақда ЎФА матбуот хизмати хабар берди.

«Мамлакатимизда тараққиёт кушандаси бўлган коррупцияга қарши курашиш, жамиятнинг барча жабҳаларини унинг ҳар қандай кўринишидан ҳоли қилиш борасида кенг кўламли амалий ишлар олиб борилмоқда. Энг муҳими фуқароларда ушбу иллатга нисбатан муросасизлик кайфияти шаклланди. Бунинг натижасида эса кўплаб соҳалар қатори, миллионлар ўйини ҳисобланган футбол ҳам жадал ривожланаётгани барчамизга маълум.

Тарихда илк маротаба Ўзбекистон Олимпия миллий жамоасининг Париж олимпиадасида иштирок этгани ёки миллий жамоамизнинг жаҳон чемпионатида қатнашиш ҳуқуқини қўлга киритгани фикримиз далилидир.

Аммо шоли курмаксиз бўлмаганидек, айрим масъулларнинг содир этаётган ножўя қилиқлари тизимнинг истиқболига соя солиши мумкин.

Навоий шаҳрида фаолият юритувчи «Қизилқум» профессионал футбол клубининг «U-19» жамоаси бош мураббийи гарчи ўйинчилар жамоага белгиланган синовларда сараланиб, клуб комиссиясининг қарори ва раҳбарнинг тегишли буйруғи асосида қабул қилинишини билса-да, ўз хизмат мавқейидан фойдаланган ҳолда Нурота туманида яшовчи, 2008 йилда туғилган ўсмирнинг ишончига кирди. Аниқроғи, уни жамоанинг асосий таркибига ўйинчи сифатида қабул қилиш эвазига 20 миллион сўм талаб қилди.

Аммо бош мураббий сўралган пул маблағини олган вақтида Давлат хавфсизлик хизмати ва Иқтисодий жиноятларга қарши курашиш департаменти ходимлари томонидан ашёвий далиллар билан ушланган.

Ҳозирда унга нисбатан Жиноят Кодексининг 168-моддаси 3-қисми «B» банди билан жиноят иши қўзғатилиб, тергов ҳаракатлари олиб борилмоқда.

Таъкидлаш лозимки, бугунги кунда Ўзбекистон футбол ассоциацияси томонидан футболда ҳалоллик ва шаффофликни таъминлаш энг устувор вазифалардан бири сифатида белгилаб олинган.

Агарда ушбу тамойилларга амал қилинмаса – бу ёш авлоднинг футбога бўлган ишончига салбий таъсир кўрсатиши мумкин.

Футболда барча иштирокчилар адолатли, шаффоф ва юқори профессионал стандартларга риоя қилиши мажбурий ҳисобланади.

Бу борада Ўзбекистон футбол ассоциацияси жамоалар, футболчилар ва мутахассисларни қатъий огоҳлантиради ҳамда тизимни коррупциядан ҳоли бўлиши учун барча чора-тадбирларни кўради», — деб ёзади ЎФА матбуот хизмати.