«Гавр» бир дақиқада қизил олди ва «Тулузани» енгди
Франция Лига 1нинг 22-турида «Гавр» «Тулуза»га қарши баҳс олиб борди. Мезбонлар учрашувнинг илк лаҳзаларидanoq бир футболчисидан айрилганига қарамай, якунда ғалабани илиб кетишга муваффақ бўлди. Бу ҳақда euro-football.ru хабар беради.
Старт ҳуштагидан кўп ўтмай Аруна Сангате Эмерсонни қўпол тўхтатиб, қизил карточка олди ва «Гавр» деярли бутун ўйинни 10 киши бўлиб ўтказди. Шунга қарамай, 43-дақиқада Исса Сумаре прессингда тўпни олиб қўйди, дарвозабонни ҳам алдаб ўтиб ҳисобни очди — 1:0.
Биринчи бўлимга қўшиб берилган дақиқаларда «Тулуза» бурчак тўпини хавфли ижро этди: Чарли Крессуэлл тўпни жарима майдонида турган Джибрил Сидибега узатди ва ҳимоячи аниқ зарба билан мувозанатни тиклади — 1:1.
Иккинчи бўлим бошида «Гавр» яна тезкор ҳужум билан жавоб қайтарди: 53-дақиқада Софиан Буфал тўпни илиб қолди ва Сумарега қулай пас узатди. Ҳужумни охиригача етказган Сумаре дубл қайд этиб, мезбонларни яна олдинга олиб чиқди — 2:1.
75-дақиқада «Тулуза»нинг умиди пайдо бўлгандек бўлди — жарима майдонидаги курашда Сантьяго Идальго тўпни дарвозага йўллади. Бироқ VAR аралашувидан сўнг гол бекор қилинди: эпизодда қоида бузилиши қайд этилди.
Натижада «Гавр» 2:1 ҳисобида ғалаба қозониб, турнир жадвалида соф 13-ўринга кўтарилди. «Тулуза» эса 9-поғонада қолди.