Мартинес Роналду қачон футболни тарк этишини айтди
Португалия терма жамоаси бош мураббийи Роберто Мартинес Криштиану Роналду фаолиятини қачон якунлаши мумкинлиги ҳақидаги саволга муносабат билдирди. Бу ҳақда euro-football.ru хабар беради.
Февраль бошида 41 ёшга тўлган Роналду ҳануз юқори спорт формасини сақлаб турибди. Мартинеснинг таъкидлашича, ҳужумчининг жисмоний кўрсаткичлари уни яна узоқ вақт майдонда кўриш мумкинлигини англатади.
«Унинг физик ҳолати яна, яна ва яна ўйнашга етади. Менимча, масала шундаки, у ўзи қачон тўғри вақт келганини ҳис қилади. Роналду жуда талабчан футболчи: қачон жамоага энди фойда бера олмаётганини англаб етса, шунда тўхташ ҳақида қарор қилади», — деди Мартинес BBCга берган интервьюсида.
Клуб миқёсида Роналду «Ал-Наср» сафида тўп сурмоқда. Хабарларга кўра, юлдуз футболчи шанба куни жамоа таркибига қайтиши кутилмоқда — у клуб бошқарувидан норозилигини билдириб, бир неча учрашувни ўтказиб юборган.
«Ал-Фатех» — «Ал-Наср» баҳсини LiveResult орқали матнли трансляцияда кузатиш мумкин.