Игор Тудор «Тоттенҳэм» бош мураббийи этиб тайинланди
Игор Тудор «Тоттенҳэм» бош мураббийи лавозимини эгаллади. Лондон клуби хорватиялик мутахассис билан жорий мавсум якунигача мўлжалланган шартнома имзоланганини расман эълон қилди. Бу ҳақда euro-football.ru хабар беради.
47 ёшли мураббий тайинловдан сўнг фикр билдириб, клубга шундай муҳим паллада келиш ўзи учун катта шараф эканини таъкидлади. Тудор зиммасидаги масъулиятни яхши тушунишини айтиб, асосий мақсади жамоа ўйинига барқарорлик киритиш ва ҳар бир учрашувда максимал даражада курашиш бўлишини қайд этди.
«Бу ерда кучли футболчилар бор. Менинг вазифам — уларнинг ишини тўғри йўлга қўйиш, энергия бериш ва имкони борича тез натижаларни яхшилаш», — дея Тудорнинг сўзларини клуб матбуот хизмати келтирди.
Тудор ўтган йили «Ювентус»да етти ой ишлаган, октябрь охирида эса жамоани тарк этганди.
Ҳозир «Тоттенҳэм» АПЛ жадвалида 16-ўринда бормоқда. Албатта, бундай натижа лондонликларни қониқтирмаётгани аниқ.