Наумов Моуриньо учун энг мос лига Саудия деди
“Локомотив”нинг собиқ президенти Николай Наумов “Бенфика” бош мураббийи Жозе Моуриньо фаолиятини давом эттириши мумкин бўлган чемпионат ҳақида фикр билдирди. У “Евро-Футбол.Ru” нашрига берган интервьюсида португалиялик мутахассисга айнан Саудия Арабистони лигаси мос келишини таъкидлади. Бу ҳақда euro-football.ru хабар беради.
Наумовнинг айтишича, Моуриньонинг энг ёрқин даври ортда қолган: у мураббий сифатида танаффус қилиши керак, чунки замонавий футбол талаблари фонида аввалги янгилик ва кутилмаган қарорлар кўринмаяпти. Экспертнинг фикрича, ҳозир Моуриньо аввалгидек сирли ва оригинал эмас, ўртамийона мураббий кўринишида қолиб кетган.
“Саудия Арабистонида унга яхши бўлади: маошлар катта, у ерда можароларни яхши кўришади, ёши катта юлдуз футболчилар билан ишлаш имконияти ҳам бор”, — дея Наумовнинг сўзлари келтирилди.
Моуриньо бошқарувидаги “Бенфика” Чемпионлар лигаси 1/16 финалида Мадриднинг “Реал”ига қарши майдонга тушади. Илк учрашув 17-февраль куни Португалияда бўлиб ўтади.