Майкл Оуэн МЮ чемпионлик пойгасига қайтишини айтди
Мадриднинг "Реал"и ва "Ливерпул" собиқ ҳужумчиси Майкл Оуэн "Манчестер Юнайтед" сўнгги пайтларда анча ўзгариб, натижалар жиҳатидан сезиларли ўсишга эришганини таъкидлади. Унинг фикрича, Рубен Аморим кетганидан кейин жамоа янги нафас олди, ҳозир эса бош мураббийлик вазифасини Майкл Керрик бажармоқда. Бу ҳақда euro-football.ru хабар беради.
Оуэн "қизил иблислар" мавсумни кучли тўртликда якунлаши мумкинлигини айтди. У ҳатто АПЛнинг янги мавсуми эртага бошланса, "МЮ" ҳозирги "Манчестер Сити" ва "Ливерпул" формаси фонида чемпионлик учун реал кураш олиб бориши мумкинлигини қайд этди. Оуэннинг таъкидлашича, гранд клублар айни дамда энг яхши ҳолатда эмас ва шу сабабли титул учун одатдагидан камроқ очко ҳам етарли бўлиши мумкин.
"Манчестер Юнайтед" сўнгги турда "Вест Ҳем" билан 1:1 ҳисобида дуранг ўйнади. Айни пайтда жамоа 45 очко билан АПЛ турнир жадвалида тўртинчи ўринда бормоқда.