Паненка машҳур пеналтаси устидан баҳсга жавоб қайтарди
Чех футбол афсонаси Антонин Паненка «паненка» услубида тепилган пеналти рақибни менсимаслик деган фикрга қўшилмаслигини айтди. У бу зарбани илк бор Европа чемпионати-1976 финалида қўллаб, футбол тарихига кириб қолган. Бу ҳақда euro-football.ru хабар беради.
Паненкага кўра, бундай ижро ҳазил ёки камситиш эмас, балки ўша вазиятда гол уриш эҳтимоли юқори бўлган ечим. «Буни ҳурматсизлик дейишадими? Мен бунга қўшилмайман. Ўша пайтда мен фақат гол уришни ўйлаганман. Европа чемпионати финалида рақиб устидан кулиш хаёлингга ҳам келмайди. Мен футболни севаман ва ҳеч ким устидан кулишни истамаганман. Менимча, бу гол уришнинг энг яхши йўли эди», — деди Паненка Cadena SER радиосининг El Larguero дастурида.
Эслатиб ўтамиз, аввалроқ Паненка нега унинг фикрича, Браим Диас Африка миллатлар кубоги финалида «паненка» усулида гол ура олмаганини ҳам изоҳлаган.