Точилин МОҚ санкцияларни бекор қилса, FIFA ва UEFАдан ҳам ўзгариш кутади

Футбол мутахассиси Александр Точилин «Евро-Футбол.ru»га берган интервьюсида FIFA президенти Джанни Инфантинонинг Россияга қўйилган тақиқ бўйича фикрлари ҳамда МОҚ яқин келажакда Россия спортига нисбатан барча санкцияларни олиб ташлаши мумкинлиги ҳақидаги хабарларга муносабат билдирди. Бу ҳақда euro-football.ru хабар беради.

Точилин глобал ОАВда Милан шаҳрида ўтган МОҚ йиғилишида Россияга оид чекловларни бекор қилиш бўйича принципиал қарор қабул қилингани айтилаётганини эшитиб, бундай сценарий рўй беришидан умид қилаётганини таъкидлади. Унинг айтишича, бу мавзу анча вақтдан бери муҳокама қилинади ва яккаланишдан чиқиш учун Европада аниқ сиёсий-ижтимоий қарор керак бўлади.

Экспертнинг фикрича, йирик мусобақалар Россиясиз ҳам томошабин топади, аммо рақобат ва интрига пасаяди. Шунинг учун ҳам у «гап амалда ҳам тасдиқланса» деган умидни яширмади.

Бир неча кун аввал Инфантино Россия жамоаларига қўйилган бан мантиқсизлигини айтиб, чекловларни юмшатиш тарафдори эканини билдирганди. Точилин бу баёнотни дунёдаги жараёнлар фонида табиий тенденция деб баҳолаб, Россияга нисбатан икки хил стандартлар ва холис бўлмаган ёндашувлар ҳамон сезилишини қўшимча қилди.

Шу билан бирга, у тақиқнинг ўзи «абсурд ҳолат» эканини спорт раҳбарлари ҳам тушунаётганини айтди.

Мутахассис МОҚ санкцияларни бекор қилса, бу футболга ҳам бевосита таъсир кўрсатишини, FIFA ва UEFАдаги позициялар ҳам қайта кўриб чиқилиши эҳтимоли юқорилигини таъкидлади. Унингча, МОҚ каби йирик тузилманинг биринчи бўлиб қадам ташлаши прецедент яратади ва қолган ташкилотлар ҳам ортидан эргашади.

Инфантино келажакда жамоаларни сиёсий сабаблар билан мусобақалардан четлатишни қонуний жиҳатдан тақиқлаш кераклигини ҳам айтганди. Точилин эса спортнинг бош шиори сиёсатдан холи бўлиш экани, Россияга нисбатан қабул қилинган қарорлар айнан шу тамойилга зид келаётганини эслатди.

ОАВларда FIFA апрель ойидаги конгрессда Россиянинг халқаро турнирларга тўлиқ қайтиши масаласини кўриб чиқиши мумкинлиги ҳақида ҳам ёзилмоқда. Точилин бундай муддатларда қайтиш эҳтимолини инкор этмади ва бундай маълумотлар «бекордан-бекорга» тарқамаётганини таъкидлади.

У Россияга рухсат берилгандан кейин ҳам айрим рақиблар майдонга чиқишдан бош тортиши мумкинлигини тан олди. Бундай вазиятда регламентга қатъий амал қилиниши, қоидабузарлик бўлса интизомий чоралар қўлланиши кераклигини айтди.

Точилин техник мағлубиятлар қўлланилиши бошқа жамоалар учун ҳам сигнал бўлишини, бундай демаршлар охир-оқибат ўзига зарар етказишини таъкидлади.