Роган Пимблеттнинг Гэтжига қарши чиқишидан қаттиқ ҳайратда қолди

58 ёшли таниқли америкалик подкастер ва UFC шарҳловчиси Жо Роган британиялик Пэдди Пимблеттнинг Жастин Гэтжига қарши жангдаги услубини кўриб, очиқчасига ҳайратини яширмади. Унингча, Пэдди бу сафар “ақлли режа” эмас, балки тўғридан-тўғри портлаш йўлини танлаган.

“Жангнинг илк сониялариданоқ Пэдди гўё тактикани уйда қолдириб кетгандек бўлди. Биз унинг бетартиб услубига ақл ва ҳисоб-китоб қўшилаётганини гапириб келаётгандик, аммо бу жангда бундай нарсани кўрмадик… У оёққа келадиган зарбаларни тўхтатишга ҳам уринмай, олдинга отилди, рақибга яқин масофани ёриб кирди ва кучли зарбаларни ёғдирди. Ҳатто “разведка” ҳам қилмади… Бу мутлақо телбалик эди”, — дея Роган сўзларини “Bloody Elbow” нашри келтирди.

Роганнинг фикрига кўра, бу каби “ҳамма нарсани бир картага тикиш” услуби мухлислар учун томошабоп бўлиши мумкин, аммо Гэтжи каби тажрибали ва қаттиқ зарбага эга рақибга қарши бу жуда хавфли танлов. Чунки бундай темпда сен нафақат куч сарфлайсан, балки бир-икки майда хато ҳам жанг тақдирини кескин буриб юбориши мумкин.

Эслатиб ўтамиз, “UFC 324” турниридаги супер тўқнашувда Жастин Гэтжи ҳакамларнинг якдил қарори билан Пэдди Пимблеттни мағлуб этди. Пэддининг юраги борлигига шубҳа йўқ, лекин шу жанг яна бир бор кўрсатди: катта саҳнада фақат жасорат эмас, совуққон режа ҳам керак.