Арбелоа: Мбаппе ва Винисиус "Реал"нинг ғалабасида ҳал қилувчи куч

Испания чемпионатининг 21-тури доирасида “Реал” сафарда “Вильярреал”ни 2:0 ҳисобида мағлуб этиб, навбатдаги муҳим уч очкони қўлга киритди. Ушбу баҳсдан кейин “қироллик клуби” бош мураббийи Альваро Арбелоа жамоанинг ҳужум чизиғидаги етакчилари Килиан Мбаппе ва Винисиус Жуниорнинг ҳозирги ҳолати, меҳнати ва жамоага фойдаси ҳақида ўз фикрларини билдириб ўтди.

Арбелоанинг таъкидлашича, бу икки футболчи ҳозирги кунда дунёдаги энг кучлилар қаторида эмас, балки айнан энг юқори поғонада туради. Чунки улар бир лаҳзанинг ўзида ўйин манзарасини ўзгартириб, рақиб режасини йиртиб ташлашга қодир.

Мураббийнинг сўзларига кўра, “Реал” имкони борича тўп назоратини ушлаб туришга интилади. Бу услубда Винисиус қанотда тўпни қабул қилиб, яккама-якка вазиятлар яратиши, Мбаппе эса бўш ҳудудларга чаққон югуришлар билан ҳимоя ортига кириб бориши жамоа учун ҳал қилувчи қуролга айланмоқда. Арбелоа бу ерда “янги гап” қидирмаганини ҳам очиқ айтди: мухлислар бу икки юлдузнинг нималарга қодир эканини аллақачон билади.

Бироқ мураббийни энг кўп қувонтирган жиҳат — уларнинг фақат маҳорат эмас, меҳнат билан ҳам жамоага етакчилик қилаётганидир. Арбелоа Мбаппе ва Винисиуснинг жамоага садоқатини алоҳида урғулади: улар биринчи бўлиб прессинг бошлайди, ярим ҳимоячилар билан узвий ҳаракат қилади, ҳар бир эпизодда жонбозлик кўрсатади, зарур пайтда орқага қайтиб ҳам ишлайди.

“Реал” мухлислари учун энг ёқимлиси шуки, бу меҳнат ўз самарасини беряпти: голлар келяпти, ғалабалар давом этяпти, жамоанинг ҳужумдаги куч-қудрати янада ошяпти. Арбелоа эса айни пайтдаги форма ва муносабатдан тўлиқ мамнун эканини яширмади.

Қисқаси, “Реал”нинг бугунги юзи — нафақат тўпни тўрга кирита оладиган юлдузлар, балки ҳар бир дақиқада жамоа учун ишлайдиган, майдонда масъулиятни ҳис қиладиган лидерлар. Мбаппе ва Винисиус ҳозир ана шундай қиёфада кўринаяпти.