Гвардиола Холанднинг юкламаси ҳақида аниқ жавоб берди

“Манчестер Сити” бош мураббийи Хосеп Гвардиола матбуот анжуманида Эрлинг Холанднинг майдонда жуда кўп вақт ўтказаётгани ҳақидаги саволга кескин ва очиқ тарзда жавоб қайтарди. Пепнинг фикрича, бу мавзуда қайта-қайта гап очишдан катта фойда йўқ — чунки ҳозирги футбол реаллиги барча жамоаларни бир хил босим остига қўймоқда.

— Нега биз бу мавзуларни яна бир бор муҳокама қиламиз? Ҳеч нарса ўзгармайди, — деди Гвардиола.

У мисол сифатида “Сити”нинг “Будё-Глимт”га қарши ўйинини эслаб ўтди: ўша баҳсда жамоа таркибида 11 нафар футболчи йўқ бўлган. Пеп бу ҳолат фақат манчестерликларга хос эмаслигини ҳам таъкидлади. Унинг айтишича, “Астон Вилла”, “Тоттенхэм” каби клубларда ҳам жароҳатлар кўпайган, чунки тақвим ҳаддан ташқари тиғиз.

Гвардиола бугунги футболда юклама ошгани табиий эканини айтиб, Холанд бундай темпга мос келадиган ўйинчи эканига ишора қилди:

— Жамоалар кўп учрашув ўтказяпти. Холанднинг жисмоний имкониятлари бор ва у бу юкламани кўтара олади, — деди у.

Айни пайтда “Манчестер Сити” Англия Премьер-лигасида 2-ўринни эгаллаб турибди. “Шаҳарликлар” пешқадам “Арсенал”дан 7 очко орқада бормоқда. Демак, Пеп учун ҳозирги энг катта “драма” — Холанднинг қанча ўйнаётгани эмас, балки чемпионлик пойгасидаги ҳар бир очконинг қиймати.