"Персеполис"даги дебют голидан сўнг Игорь Сергеев нималар деди?
Эрон Про лигасининг 17-турида «Персеполис» ўз майдонида принципиал рақиблардан бири — «Сепахон»ни 2:1 ҳисобида мағлуб этди. Учрашувнинг энг ёрқин нуқтаси шундаки, мезбонлар томонидан киритилган ҳар икки голга ҳам ўзбекистонлик футболчилар муаллифлик қилди: ҳисобни Остон Ўрунов очди, ғалабани мустаҳкамлаган ҳал қилувчи зарбани эса Игорь Сергеев амалга оширди.
Қорли об-ҳаво, қаттиқ кураш ва юқори темпда кечган ўйиндан кейин Игорь Сергеев ўзининг «Персеполис» сафидаги илк голи, Ўрунов билан ўзаро тушуниш ва учрашув охирида олган қизил карточкаси ҳақида фикр билдирди.
Унинг айтишича, баҳс жамоа учун енгил кечмаган:
«Бу ўйин биз учун жуда оғир ўтди. Дебют голимни урганимдан, албатта, хурсандман. Лекин сўнгги дақиқаларда қизил карточка олганим ачинарли бўлди. Шунга қарамай, қўлга киритилган 3 очко жамоа учун жуда қиммат эди. Қорли ҳавода ўйнаш осон эмас, аммо “Персеполис”даги барча футболчилар ҳақиқий жангчи ва бақувват», — деди ҳужумчи.
Сергеев голли эпизодда Остон Ўруновнинг ҳиссасини алоҳида таъкидлаб, жамоадошига миннатдорлик билдирди. Унинг таъбирича, айнан Ўруновнинг ўзига ишонч берган ҳаракати дебют голини тезроқ урлишига сабаб бўлган:
«Ўйлайманки, Остон мен орқасида эканлигимни кўрди ва “Персеполис”даги биринчи голимни уришимда менга катта ёрдам берди. Бу учун унга раҳмат. Ушбу гол менинг ўзимга бўлган ишончимни янада оширди», — деди Сергеев.
Шу билан бирга, учрашув сўнгги дақиқаларида олган қизил карточка ҳам ҳужумчининг кайфиятига таъсир қилган. У кейинги ўйинни ўтказиб юбориши аниқ бўлгани учун жамоа бош мураббийидан узр сўрашини ҳам очиқ айтди:
«Қизил карточка олганим ва кейинги ўйинни ўтказиб юборадиган бўлганим учун бош мураббийдан узр сўрайман. Барча мухлисларимизга раҳмат. “Персеполис” — менинг жамоам. Биз ҳар бир учрашувда ғалаба қозониш учун курашамиз», — деди у.
Қисқаси, «Персеполис» учун бу ғалаба турнир жадвали нуқтаи назаридан ҳам, руҳий жиҳатдан ҳам муҳим бўлди. Энг муҳими — Ўрунов ва Сергеевнинг голлари ўзбекистонлик мухлисларга яна бир бор фахрли кайфият улашди. Энди эса барчанинг диққати кейинги учрашувга қаратилган: жамоа Сергеевсиз қандай ечим топади, Ўрунов эса бу темпни сақлаб қололадими — интрига шу ерда.