IBF тасдиқлади: Бивол энди германиялик Айфертга қарши жанг қилади
Халқаро бокс федерацияси (IBF) 79,4 кг (ярим оғир вазн) тоифасида чемпионлик жанги бўйича расмий қарорини эълон қилди. Энди россиялик чемпион Дмитрий Бивол немис боксчиси Михаэл Айфертга қарши рингга кўтарилади, деб хабар бермоқда “Boxing Scene” нашри.
Эътиборли жиҳати шундаки, IBF ушбу қарорни иккинчи марта тасдиқлаяпти. Дастлаб Бивол — Айферт тўқнашуви 2025 йил охирига белгиланган эди. Бироқ россиялик боксчи бел қисмида ўтказган операциядан кейин тикланиш жараёни сабаб тиббий кечиктириш олган ва жанг вақти сурилган.
Шу тариқа, чемпионлик баҳси яна кун тартибига қайтди. Бивол учун бу — унвонни ҳимоя қилиш, ўз вазнидаги мавқеини мустаҳкамлаш ва рақибларга “мен ҳали шу ердаман” деган сигнал бериш имконияти.
Михаэл Айферт ҳақида қисқача тўхталсак, у 2018 йилдан профессионал боксда фаолият юритиб келмоқда. Немис боксчисининг энг катта ютуқларидан бири — собиқ жаҳон чемпиони, канадалик Жан Паскал устидан қўлга киритган ғалабаси ҳисобланади. Бу натижа Айфертнинг оддий рақиб эмаслигини, катта саҳнага тайёрлигини кўрсатган воқеалардан бири бўлган.
Албатта, бу жанг атрофидаги асосий саволлар ҳозирданоқ туғиляпти: операциядан кейин Бивол қандай спорт формасида бўлади, Айферт эса чемпионга қарши жангда қай даражада хавфли қуролларини ишга сола олади? Бир нарса аниқ — IBF тасдиқ берди, демак чемпионлик оқшоми энди реал сценарийга айланди. Мухлисларга эса қолгани — санани кутиш ва катта тўқнашувга тайёр туриш.