"Пахтакор" Анталия йиғинини бошлайди: 26 футболчи рўйхати аниқ бўлди

«Пахтакор» янги мавсумга тайёргарликнинг биринчи босқичини Туркияда ўтказиш учун 17 январь куни тонгда Анталияга йўл олди. Жамоанинг ушбу ўқув-йиғини 30 январга қадар давом этиши белгиланган бўлиб, йиғин давомида «шерлар» учта назорат учрашувида майдонга тушади.

Клуб маълумотига кўра, мазкур босқичда асосий эътибор жисмоний тайёргарликни тўғри шакллантириш, ўйин ритмини тезроқ ушлаб олиш ҳамда тактик ғояларнинг амалиётда синаб кўрилишига қаратилган. Қисқа қилиб айтганда, Анталиядаги ҳар бир машғулот — мавсум бошлангунча жамоа “двигатели”ни ишга тушириб олишга хизмат қилади.

Бироқ йиғин тўлиқ таркибда ўтмайди. Владимир Назаров, Маҳмуд Маҳаммаджонов, Иброҳим Ибрагимов, Ойбек Бозоров ва Рустам Турдимуродов миллий терма жамоа йиғинида иштирок этиши сабабли Анталиядаги биринчи йиғинни ўтказиб юборади. Шунингдек, Фламарион жароҳати туфайли жамоага кейинроқ қўшилиши айтилмоқда.

Бош мураббий Камолиддин Тожиев мазкур йиғин учун 26 нафар футболчини танлаб олган. Ушбу рўйхатдаги ўйинчиларнинг вазифаси битта: йиғинни “галочка” учун эмас, реал рақобат ва форма учун ўтказиш. Чунки назорат ўйинлари номи “ўртоқлик” бўлса ҳам, ундаги хулоса — расман мавсумнинг пойдевори.