Арман Царукяннинг “бош зарбаси” унга титул йўлини ёпди
UFCда баъзан бир зарба – ҳатто жангнинг ўзи эмас, айнан жанг олдидан қилинган ҳаракат ҳам катта қарорларни ўзгартириб юборади. Енгил вазн тоифасида ҳаракат қилувчи Арман Царукян билан боғлиқ охирги можаро ҳам шундай бўлди: у вақтинчалик чемпионлик жанги учун танланмади.
Промоушен президенти Дана Уайтнинг айтишича, бу қарорга Арманнинг хатти-ҳаракати бевосита таъсир қилган. Гап шундаки, жанг олдидан ўтказилган анъанавий стердаун (юзма-юз қарашув) вақтида Царукян рақиби Дэн Хукернинг юзига боши билан зарба бериб юборган. Вазият кескин тус олгач, UFC расмийлари ва хавфсизлик хизмати зудлик билан аралашиб, жангчиларни ажратиб қўйган эди.
Орадан кўп ўтмай, енгил вазндаги вақтинчалик чемпионлик камари учун жанг айнан Арманга эмас, Жастин Гэтжи ҳамда Пэдди Пимблеттга берилгани маълум қилинди. Яъни, титул йўлидаги “навбат” ҳам, “имкон” ҳам бошқа тарафга бурилди.
Дана Уайт эса буни очиқ айтди:
“Титулга даъвогарларни танлашда турли омилларни ҳисобга оламиз. Жангчининг ўзини тутиши ҳам шулар қаторида. Арманнинг ҳаракати қароримизга юз фоиз таъсир қилди”, — деди у журналист Робби Фоксга берган интервьюсида.
Эслатиб ўтамиз, ўтган йил ноябрь ойида Арман Царукян айнан Дэн Хукерни 2-раундда бўғиш усули орқали мағлуб этганди. Аммо бу сафар рингдаги натижа эмас, ринг олдидаги интизом биринчи ўринга чиқди.
Қисқаси, UFCда фақат мушт эмас — мия ҳам ишлаши шарт. Чунки чемпионликка борувчи йўлда баъзан энг қийин рақиб… ўзингнинг эмоциянг бўлиб қолади.