6 та рекорд: Роналду 2026 йилда ушбу рекордларни "ура" оладими?
Криштиану Роналду — футбол тарихидаги энг совриндор ва самарали футболчилардан бири. “Ан-Наср”нинг 40 ёшли ҳужумчиси 2026 йилга қадам қўйиб, яна бир неча йирик рекордларни қўлга киритиши мумкин. 5 феврал куни 41 ёшга тўладиган Роналду, ҳар доимгига ўхшаб, мотивациясини юқори сақлаб, янги рекордларга эришишга интилаяпти. Европа ОАВ Роналдунинг эришиши мумкин бўлган олтита рекордни ажратиб кўрсатди.
1. 1000 та голга етиш: тарихий марра
Роналду ҳозирда 958 та расмий голга эга. У 1000-голи учун яна 42 та гол урса, футбол тарихида расмий ўйинларда 1000 гол урган илк футболчига айланади. Ушбу маррага эришиш учун, футболчи 2026/27 йил мавсуми бошида янги рекорд қўйиши мумкин.
2. Тўрт мамлакат чемпионлиги
Роналду Англия, Испания ва Италияда чемпион бўлган. Агар “Ан-Наср” Саудия Про-лигасида ғолиб бўлса, у тўрт хил мамлакатдаги лига чемпионликларини қўлга киритган футболчи бўлади. Бунга Роббен, Ибраҳимович, Бекҳем, Ривалдо каби юлдузлар эришган.
3. Олтита Жаҳон чемпионатида гол урган илк футболчи
Агар Роналду 2026 йилги Жаҳон чемпионатида гол урса, у олтита турли мундиалда гол урган футболчига айланади. Бу рекорд ҳозиргача фақат унга насиб этиши мумкин.
4. 200 та пеналтини голга айлантирган илк футболчи
Роналду футбол тарихида энг кўп пеналти (181) голга айлантирган футболчи ҳисобланади. 200лик чегарага етгани ҳолда, у бу соҳада ҳам янги рекордни ўрнатиши мумкин.
5. “Ан-Наср”нинг энг сермаҳсул легионери
“Ан-Наср” клуби тарихидаги энг сермаҳсул легионер рекорди Марокашлик Абдерразак Ҳамдаллоҳга тегишли. Унинг ҳисобида 115 гол бўлса, Роналду 114 та гол урган. У яна иккита гол ургани ҳолда, клуб тарихидаги энг яхши хорижлик тўпурарга айланиши мумкин.
6. 30 ёшдан кейин 500 та гол урган илк футболчи
Роналду 30 ёшдан кейин 495 та гол урган. У яқин орада 500 та гол маррасини босиб ўтиб, бу борада ҳам футбол тарихида биринчи бўлиши кутилмоқда.
2026 йилда Криштиану Роналду футбол тарихида яна бир янги саҳифа очиши ва янги рекордларнинг асл эгаси бўлиш эҳтимоли юқори. Унинг жанговар руҳи ва мотивацияси янги муваффақиятлар учун кучли ресурс бўлиб хизмат қилади.