FIFA JCh-2026 учун офсайдни аниқлаш тизимини такомиллаштиради

FIFA 2026 йилги Жаҳон чемпионатига қадар офсайдни аниқлаш технологиясини янада такомиллаштиришни режалаштирмоқда. Бу ҳақда ташкилот президенти Жанни Инфантино маълум қилди.

Унинг сўзларига кўра, ўйинчилар жойлашувини аниқ қайд этиш учун FIFA сунъий интеллект ёрдамида барча футболчиларнинг 3D моделлари яратиладиган ечимни жорий этади. Натижада тизим офсайд ҳолатини белгилашда тезроқ ва аниқлик билан ишлаши кутилмоқда.

Аввалроқ Халқаро футбол ассосациациялари кенгаши 2026 йил 20 январ куни офсайд қоидаларига оид эҳтимолий ўзгаришларни муҳокама қилиши ҳақида хабар берилганди. Агар янгиликлар маъқулланса, улар жорий мавсумнинг ўзидаёқ кучга кириши мумкин.

2026 йилги Жаҳон чемпионати 11 июндан 19 июлгача Канада, Мексика ва АҚШда бўлиб ўтади. Мусобақада илк бор 48 та жамоа қатнашади, улар орасида Ўзбекистон терма жамоаси ҳам бор.