Суперлига-2026. Тақвим режаси клублар билан келишилди
25 декабр куни Ассоциация миллий жамоа бош мураббийи Фабио Каннаваронинг ЖЧ-2026 учун режасини ЎзПФЛга тақдим этгач, Суперлига-2026 тақвим режасида ўзгаришлар юз берган.
ЎзПФЛ хабарига кўра, эндиликда май ойининг 5-санасидан бошлаб Суперлига учрашувларини ўтказиш имконияти мавжуд эмас. Шу тариқа Лига август ойидаёқ ишлаб чиқилган тақвим режасини ўзгартиришга мажбур бўлди.
«Биз 24 соат ичида янги режани клубларга тақдим этдик ва улар белгиланган муддатда янги тақвимга розилик билдирди. Миллий жамоа 5 май санасидан эътиборан маҳаллий футболчилар иштирокида йиғинга киришади ва 10, 17, 24 май кунлари Суперлиганинг етакчи клубларига қарши ўртоқлик ўйинларида иштирок этади. Жараён июн ойидаги ФИФА кунлари ҳамда жаҳон чемпионатига уланиб кетади.
Май, июн, июл ойлари давомида катта танаффус юзага келаётгани, бу Суперлига яхлитлигига таъсир кўрсатаётганлигини инобатга олган ҳолда, май ойининг қолган қисми Ўзбекистон кубоги билан давом эттирилади.
Ўз навбатида, Лига Осиё кубоги-2027 яқинлашиб келаётганлигини ҳам ҳисобга олди. Бош жамоага номзод футболчиларнинг декабр ойи давомида қисқа таътилга чиқиши ва кейинчалик Осиё кубоги олдидан йиғинларга киришиши долзарб масала ҳисобланади. Шуни инобатга олган ҳолда, ЖЧ-2026 якунидан кейинга режа қилинаётган мавсумнинг иккинчи қисми 20 июл санасидан давом эттирилади.
Суперлиганинг сўнгги тури 3 декабр санасига тўғри келади. Ўтиш ўйинлари ва Ўзбекистон кубогининг ярим финалида иштирок этмайдиган клублар шу санадан кейин танаффусга йўл олади. Ўтиш ўйинидан жой олган жами тўрт учрашув қисқа вақт ичида ташкил этилиши, оғир мавсумдан кейин клублар учун эҳтимолий рақиблардан келиб чиқадиган локация билан боғлиқ муаммоларни енгиллаштириш, футболчиларнинг учрашувлар оралиғида тикланиш имкониятларини ҳисобга олиб, марказлаштирилган ҳолда Тошкентда ўтказилади», - дейилади ЎзПФЛ хабарида.
Қайд этилишича, ёзги трансфер ойнаси 22 июн — 24 июл саналари оралиғига тўғри келади. Мазкур даврда клуб сафига келиб қўшилган янги футболчининг қайдномага киритилишига Суперлиганинг 14-туридан эътиборан рухсат берилади.