«Фламенго» Караскал трансфери бўйича қатъий позицияни билдирди
Франциянинг «Марсель» клуби «Фламенго» ярим ҳимоячиси Хорхе Караскални ўз сафига қўшиб олиш вариантини кўриб чиқмоқда. Бу ҳақда euro-football.ru хабар беради.
Diario AS хабарига кўра, Бразилия жамоаси 27 ёшли футболчини сотишни режалаштираётгани йўқ. Прованс клуби колумбиялик футболчига жиддий қизиқиш билдирган бўлса-да, унинг трансферини молиявий томондан кўтара олмаяпти.
Агар расмий таклиф келиб тушса, «Фламенго» фақат 25 миллион евродан юқори сумма бўйича музокара олиб боришга тайёр. Караскал бош мураббий Филипе Луис тизимида муҳим бўғин ҳисобланади.
Караскал Россияда ЦСКА ва Москванинг «Динамо» клубларида тўп сурган. У жорий йил ёзида «Фламенго»га 12 миллион евро эвазига ўтказилганди, шартномаси эса 2029 йил 30 июнгача мўлжалланган. Transfermarkt портали колумбиялик футболчининг бозор нархини 9 миллион евродан баҳоламоқда.