ЖЧ–2026 олдидан кучлар нисбати: Ўзбекистон нечанчи ўринда?
АҚШнинг CBS Sports Golazo нашри 2026 йилда бўлиб ўтадиган жаҳон чемпионати иштирокчилари орасида энг кучли терма жамоалар рейтингини эълон қилди. Манба таҳлилига кўра, ҳозирги пайтда дунё футболида энг барқарор ва қудратли жамоа сифатида Испания терма жамоаси эътироф этилган.
Рейтингнинг иккинчи поғонасини амалдаги жаҳон чемпиони — Аргентина терма жамоаси эгаллади. Учинчи ўрин эса сўнгги йилларда катта турнирларда доимий равишда фаворитлар қаторида бўлиб келаётган Франция терма жамоасига насиб этди.
Кучли олтиликни Бразилия, Англия ва Португалия терма жамоалари тўлдирган. Мутахассислар фикрича, ушбу жамоаларнинг барчаси ЖЧ–2026да чемпионлик учун жиддий кураш олиб бориш салоҳиятига эга.
Ўз тарихида илк бор жаҳон чемпионати йўлланмасини қўлга киритган Ўзбекистон терма жамоаси мазкур рейтингда 40-ўриндан жой олди. Бу натижа миллий термамиз учун янги босқичга қадам қўйилаётганини англатади ва келажакда янада юқори поғоналар учун курашиш имконияти борлигини кўрсатади.
Осиё қитъаси вакиллари орасида эса қуйидаги жамоалар юқори ўринларни банд этган:
— Япония — 14-ўрин
— Жанубий Корея — 15-ўрин
— Эрон — 20-ўрин
— Саудия Арабистони — 26-ўрин
— Қатар — 30-ўрин
— Австралия — 33-ўрин
— Иордания — 35-ўрин
— Ўзбекистон — 40-ўрин
Эслатиб ўтамиз, Жаҳон чемпионати 2026 мусобақаси АҚШ, Канада ва Мексика мезбонлигида ўтказилади ҳамда келаси йил — 11 июнь куни старт олади. Ўзбекистонлик мухлислар эса тарихий турнирда миллий термамизнинг илк иштирокини катта ҳаяжон билан кутмоқда.