«Нефтчи» трансфер бозорида фаол: нақд 9 та трансферни эълон қилди

Фарғона вилоятининг флагмани ҳисобланган "Нефтчи" янги мавсум олдидан трансфер бозорида жуда фаол ҳаракат қилмоқда. Клуб расман "Сурхон" сафида тўп суриб келган истеъдодли футболчи Асилбек Жумаевни ўз сафига қўшиб олганини эълон қилди.

Бўлажак чемпионатга катта режалар билан тайёргарлик кўраётган, бош мураббий Исломбек Исмоилов етакчилигидаги фарғоналиклар бу билан тўхтаб қолмади. Жумаев трансфери билан бир кунда клуб яна 8 нафар янги футболчининг келишини расман тасдиқлади. Бу ҳолат «Нефтчи» раҳбариятининг янги мавсум олдидан жамоани тубдан янгилашга жиддий киришганини яққол кўрсатиб турибди.

Клуб эълон қилган трансферлар қуйидагилар:
Иброҳим Шокиров, Мўминхон Баҳодирхонов, Далер Тухсанов, Рустамбек Фомин, Фарҳод Соҳибжонов, Иззатилло Пўлатов, Ҳуршидбек Ғиёсов ва легионер Ратиньо.

Бундай кенг кўламли трансфер сиёсати «Нефтчи»нинг янги мавсумда юқори ўринлар учун жиддий курашиш нияти борлигидан дарак беради. Мухлислар эса жамоадан натижа ва барқарор ўйин кутаётгани аниқ. Қисқаси, Фарғонада янги мавсум олдидан умидлар катта — эндиликда майдондаги жавоб қандай бўлишини вақт кўрсатади.