15 миллион долларлик жанг: дунёда мисли кўрилмаган турнир

2026 йил март ойида жанг спортлари тарихида янги саҳифа очилиши кутилмоқда. Рекорд даражадаги соврин жамғармасига эга глобал турнир старт олади ва у нафақат иштирокчилар сони, балки мукофот миқёси билан ҳам бутун дунё мухлисларини ҳайратга солиши тайин.

Ушбу лойиҳа Bare Knuckle Fighting Championship ташаббуси билан ва Kiss Fly Productions ҳамкорлигида амалга оширилиши режалаштирилган. Турнирда 84–120 кг вазн тоифасида, яъни ўрта вазндан оғир вазнгача бўлган диапазонда 32 нафар жангчи иштирок этади.

Энг катта интрига — бош соврин. Мусобақа ғолиби тўғридан-тўғри 15 миллион долларга эга бўлади. Бу сумма жанг спортлари учун мутлақ рекорд ҳисобланади.

Соврин жамғармаси қуйидагича тақсимланади:
– 1-ўрин: 15 миллион доллар
– 2-ўрин: 1 миллион доллар
– 3–4-ўринлар: 500 минг доллар
– 5–8-ўринлар: 300 минг доллар
– 9–16-ўринлар: 200 минг доллар
– 17–32-ўринлар: 100 минг доллар
– захирадаги жангчилар: 50 минг доллар

Девид Фелдман, BKFC президенти, мазкур мусобақа 12 ой давом этишини маълум қилди. Унинг сўзларига кўра, лига Гран-при жанглари пайтида олинган жароҳатлар сабаб жангчиларга мажбурий танаффус даври учун ҳам молиявий компенсация тўлашни режалаштирмоқда. Бу эса спортчилар хавфсизлигига жиддий эътибор қаратилаётганидан далолат.

Биринчи турнир 2026 йил март ойида Лос-Анжелес шаҳрида бўлиб ўтади. Финал эса аниқ бир йил ўтиб, Яқин Шарқ ҳудудида ташкил этилиши режалаштирилган.

Турнирга бўлган қизиқишни янада оширадиган жиҳат — Конор Макгрегорнинг иштироки. Ирландиялик суперюлдуз бу мусобақада жангчи сифатида эмас, балки бошловчи ва шоумен сифатида саҳнага чиқади.

Фелдман, шунингдек, 2026 йил ўрталаридан бошлаб аёллар учун ҳам худди шу форматдаги йирик турнирни йўлга қўйиш режада эканини таъкидлади. Бу эса лойиҳанинг узоқ муддатли ва глобал характерга эга эканини яна бир бор тасдиқлайди.

Қисқаси, 15 миллион долларлик бош соврин, юлдузли иштирокчилар ва бир йиллик драматик жанглар — 2026 йил жанг мухлислари учун унутилмас йил бўлиши аниқ.