Спаллетти Йилдиз ўйинидан ҳайратда қолганини айтди
«Ювентус» бош мураббийи Лучано Спаллетти «Пиза»га қарши 2:0 ҳисобида якунланган учрашувдан сўнг Кенан Йилдизнинг ўйинини алоҳида мақтади. Бу ҳақда euro-football.ru хабар беради.
20 ёшли ҳужумчи 92-дақиқада гол уриб, ҳисобни якуний кўринишга келтирди ва жамоасига ғалабани мустаҳкамлаб берди.
Спаллеттининг таъкидлашича, Кенан жамоанинг «ўнлик» футболчиси бўлиб, масъулиятни ўз зиммасига олиши керак. Мураббий уни ўғлидек кўришини айтиб, Йилдиз ҳар қандай паллада ўйин тақдирини ўзгартиришга қодир эканини, унинг феъл-атвори ва майдондаги сифатларига шубҳа қилмаслигини билдирди.
Жорий мавсумда Йилдиз А Серияда 6 та гол ва 4 та голли узатмани ҳисобига ёздирган. Ёш турк футболчиси бу икки кўрсаткич бўйича ҳам «Ювентус»да энг яхшиси бўлиб турибди.