Унаи Эмери “Арсенал” устидан ғалабани баланд руҳ билан баҳолади

АПЛнинг 15-турида “Астон Вилла” ўз уйида “Арсенал”ни 2:1 ҳисобида мағлуб этиб, турнинг энг катта воқеаларидан бирини амалга оширди. Учрашувдан сўнг жамоа бош мураббийи Унаи Эмери ғалаба ҳақида тўхталиб, ўйиндаги муҳими — жамоанинг кайфияти ва муносабати эканини таъкидлади.

Эмерининг айтишича, “Вилла Парк”даги бу ғалаба жамоага катта руҳий кўтаринкилик берган:

«Мен жуда мамнунман. Ҳафтани айнан шундай кучли ўйин ва муваффақият билан якунлашни хоҳлаган эдик. Айрим вазиятларда тўлиқ устун бўлдик, тезкор ҳужумлар қилдик, зарур пайтда кескинликни оширдик. “Вилла Парк” – ўзига хос муҳитга эга стадион, мухлислар бизга қанот бўлади. Уларнинг қиёфаси, реакцияси – ҳақиқий мўъжиза».

Мутахассис шунингдек, жамоа барча турнирларда барқарорликни сақлашга ҳаракат қилаётганини айтиб ўтди:

«Биз ҳар бир беллашувни алоҳида ва жиддий қабул қиламиз. Европа Лигасида ҳам яхши ўйнаш ниятидамиз, бироқ асосий мақсад – Премьер-лигада юқори ўринлар учун кураш. Бугунги ўйинда ҳам кўрганингиздек, ҳар бир баҳсга тўғри муносабат ва максимал қайфият билан тушиш жуда муҳим».

Бу ғалабадан кейин “Астон Вилла” очколарини 30 тага етказиб, турнир жадвалида 3-поғонага кўтарилди. “Арсенал” эса 33 очко билан ҳали ҳам пешқадамликни сақлаб турибди.

Эмери жамоаси бу мавсумда барқарор ўйини, агрессияси ва ўйин режасини аниқ бажариши мумкинлиги билан яна бир бор исбот берди. Мухлислар эса “Вилла”нинг юқори ўринлар учун реал даъвогарга айланганини энди нафасини ушлаб кузатмоқда.