Месси "Интер Майами" билан АҚШда янги титул қўлга киритди
Лионел Месси ўзининг афсонавий карьерасига яна бир ёрқин саҳифа қўшди. 38 ёшли аргентиналик суперҳужумчи МЛС-2025 Кубоги финалида “Интер Майами”ни бошлаб, “Ванкувер Уайткапс” устидан 3:1 ҳисобидаги ишончли ғалабага ҳисса қўшди ва АҚШдаги илк чемпионлигини қўлга киритди.
Ушбу ютуқ билан Месси профессионал фаолиятида учинчи мамлакат чемпионатида зафар қучди. У аввалроқ Испанияда “Барселона” билан 10 марта, Францияда “ПСЖ” сафида икки бор миллий чемпионликни қўлга киритганди. МЛСдаги ғалаба эса унинг коллекциясидаги навбатдаги йирик соврин сифатида тарихда қолади.
“Интер Майами”га 2023 йилда келиб қўшилган Месси қисқа фурсатда клубнинг юрагига айланди. Унинг 2028 йилгача мўлжалланган шартномаси жамоага яна бир неча мавсум юқори мақсадлар қўйиш имконини беради. Жорий мавсумнинг ўзидаёқ Месси 41 учрашувда майдонга тушиб, 38 та гол урди ва 23 та голли узатма амалга оширди — бу эса унинг ҳали ҳам олий даражада эканини исботлаб турибди.
Янги чемпионлик — Месси учун навбатдаги марра, мухлислар учун эса яна бир эсда қоларли ҳикоя. Энди “Интер Майами” унга етакчилик қилган ҳолда янги титуллар сари йўл олади.