Ташқи ишлар вазири А. Комилов Вашингтонда америкалик ҳамкасби Э. Блинкен билан учрашди
Қайд этилишича, учрашув чоғида Э. Блинкен Қўшма Штатларнинг Ўзбекистон билан стратегик ҳамкорликни теранлаштириш нияти борлигини тасдиқлаган.
АҚШ Давлат котиби “инсон ҳақлари ва демократиянинг мустаҳкамланиши дохил Ўзбекистонда давом этаётган ислоҳотлар”ни дастаклашини билдирган.
Блинкен Ўзбекистоннинг Марказий Осиёдаги бошқа давлатлар билан алоқаларни яхшилаш бўйича ташаббусини юқори баҳолаган ҳамда Ўзбекистон билан АҚШ C5+1 деб ном олган минтақавий дипломатик платформада фаол ҳамкорлик қилаётганини қайд этган.
АҚШ бош дипломати Абдулазиз Комиловга Ўзбекистоннинг Афғонистондаги тинчликни мустаҳкамлаш йўлида амалга ошираётган саъй-ҳаракатлари учун миннатдорчилик билдирган.
Ўзбекистон ташқи ишлар вазири Абдулазиз Комилов 27 июнь - 4 июль кунлари АҚШ сафарида бўлиши ҳақида Озодлик аввалроқ хабар қилган.