Покистонда поезд ёниб, камида 65 йўловчи ҳалок бўлди
31 октябрь тонгида Покистоннинг Панжоб вилоятида йўловчи поездида чиққан ёнғин оқибатида камида 65 киши ҳалок бўлди, 30 дан зиёд йўловчи яраланди. Бу ҳақда Pakistan Today. хабар қилди.
Карачидан Равалпиндига кетаётган поездда чиққан ёнғинга овқат тайёрлаш учун ишлатилган газ баллони портлаши сабаб бўлгани тахмин қилинмоқда.
Кўплаб йўловчилар ёнаётган поезддан ўзларини пастга ташлаб ҳаётини қутқариб қолганини айтган Покистон темир йўллар вазири Шайх Рашид.
Ҳалок бўлганлар орасида аёллар ва болалар ҳам борлиги, ҳозирча қурбонлардан ҳеч бирининг шахси аниқланмагани хабар қилинди. Жароҳатланганларни ташиш учун ҳарбий вертолёт юборилган, улар яқин атрофдаги шифохоналарга етказилмоқда.