Тошкентда бир аёл ногиронларга текин уй берилаётганини эшитиб икки бармоғини кесиб ташлади…
Тошкент шаҳар ҳокими Жаҳонгир Ортиқхўжаев журналистлардан бирига берган интервьюсида даҳшатли бир воқеани айтиб берди. Унинг айтишича, бир аёл қабулига кириб унга ҳам текинга квартира беришларини сўраб қичқирган. Ҳоким аёлга тушунтирган. Квартира фақат ногиронлар ва кам таъминланган оилаларга берилаётганини айтган. Орадан бир ҳафта ўтгач, аёл яна унинг қабулхонасига келиб дардини эшитишини талаб қилган. Маълум бўлишича, у уйига бориб икки бармоғини кесиб ташлабди. Ҳоким қабулига кесилган бармоқларини бинт билан бойлаган ҳолда келиб «Мана, мен ҳам энди ногиронман! Менга ҳам текин квартира берасиз», дея талаб қила бошлаган.
Афсуски, воқеанинг давоми ҳақида маълумот тарқатилмади. Тахмин қилиш мумкин. Квартира барибир расман ногиронликка чиққанлар учун сўнгсиз ҳужжатбозликлар асосида берилса керак.