Грузия собиқ президенти, Одесса собиқ губернатори Михаил Саакашвили Украинага қайтиш арафасида…
Саакашвили шу ҳақда расман ва очиқ-ойдин баён қилди. Аммо шуни ҳам алоҳида айтиб ўтдики, Украинага қайтгач, юқори лавозимларга даъво қилмайди. Қайтиш учун эса янги президент Зеленскийнинг иш бошлашини кутмоқда. У бир пайтлар тортиб олинган Украина паспортини Зеленский қайтиб беришига қаттиқ ишонмоқда.
— Порошенко қонунга хилоф тарзда мендан Украина паспортини тортиб олди, — деди Саакашвили. — Мамлакатдан эса безориларча зўрлик билан ҳайдаб солди. Ҳа, мен кутдим. Билардим. Порошенко мағлуб бўлишини кўнглим сезиб турган. Киевга қайтгач, Зеленскийдан ҳеч қанақанги юқори лавозим сўрамайман. Бу янги жамоага ўз маслаҳатларимни беришим мумкин. Агар украин халқи менинг яна юқори лавозимлардан бирини эгаллашим тарафдори бўлса, унда қаршилик ҳам қила олмайман. Хулоса қилиб айтганда, Украинага қайтгач, келажакнинг янги сиёсий арбобларини тайёрлаш билан банд бўламан…