Украиналик боксчи Владимир Кличко рингга қайтиши шарт. Гонорар икки ҳисса оширилди…
«DAZN» стриминг платформаси украиналик ўта оғир вазнли боксчи Владимир Кличкони катта спортга қайтишга даъват этмоқда. Бунинг учун Владимирнинг гонорарини икки ҳисса оширди. Ошган ҳолатда спортчининг гонорари 80 миллион доллардан иборат бўлади. Бу гонорар учта жанг учун берилади. Бундан ташқари, телеканал орқали жанг намойиш этилгани ва сотилган чипталарнинг умумий суммасидан яхшигина фоиз ҳам олади.
Агар Владимир ҳақиқатан рингга қайтса, биринчи жанг 25 май ёки 1 июнда бўлиб ўтади. Иккинчи жанг «Уимбли» спорт саройида ташкил этилиб, Кличколар кичиги Энтони Жошуа ёки Тайсон Фьюрига қарши рингга кўтарилади.
Владимир таклифга март ойи охиригача аниқ жавоб бериши керак. Баъзи манбаларда айтилишича, у Киевда машғулотларни бошлаб юборибди. Демак, Владимир катта спортга қайтиш истагида экани эҳтимолдан холи эмас.
Эслатиб ўтамиз, Владимир Кличко сўнгги бор икки йил олдин жанг ўтказган. Жанг 2017 йил 29 апрелида бўлиб ўтган. Рақиби эса Энтони Жошуа бўлиб, Владимир бу жангда имкониятни бой берган.