Сайловга оз қолди: номзод кўп, лавозим битта!
Фото: «Главком» Украинада президент сайлови яқинлашгани сари номзодларнинг ўткир-ўткир баёнотлари кўпаймоқда. Қирқ нафардан кўпроқ даъвогарга қарамай, энг юксак лавозим учун кураш асосан уч номзод ўртасида кечиши аллақачон ойдинлашган. Булар – актёр Владимир Зеленский, собиқ бош вазир Юлия Тимошенко ҳамда амалдаги давлат раҳбари Пётр Порошенко. Ҳозирча пойга бошида Зеленский бормоқда, Порошенко эса Тимошенкони қувиб, иккинчи ўринга чиқиб олган. Яқинда Украина Конституцион суди катта амалдорларни жиноий жавобгарликка тортилиши констутицияга зид, деган маънода қарор чиқарганидан сўнг Зеленский шундай баёнот берди: «Чамаси, ҳозирги ҳукумат халқ ва армиядан кўп нарса тортиб оладиганга ўхшайди. Йўқ, бунақаси кетмайди. Халқнинг нонини туя қилганлар албатта «ўтириши» керак!» Бу билан у сиёсий рақиби Порошенкога шаъма қилгани англашилади. Дарвоқе, Тимошенко хоним ҳам жим ўтиргани йўқ. Фаол сайловолди кампаниясини ўтказиш асносида Порошенкога нисбатан импичмент жараёнини бошлашини эълон қилганди. Сайловга эса бор-йўғи бир ой вақт қолди.