«Җиңү диктанты» 75 илдә 36 мең мәйданчыкта узачак
«Бердәм Россия» 24 апрельдә «Җиңү диктанты» халыкара акциясен үткәрәчәк. Быел аның өчен дөньяның 75 илендә 36 мең мәйданчык әзерләнде, дип хәбәр итә партиянең матбугат хезмәте.
«Тарихи хәтер» проекты координаторы, «Бердәм Россия» Үзәк Башкарма комитеты җитәкчесе һәм Дәүләт Думасы депутаты Александр Сидякин хәбәр иткәнчә, быел мәйданчыклар саны узган елгы күрсәткечләрдән артып киткән. Аның сүзләренчә, аларның күпчелеге мәктәпләрдә, техникумнарда һәм югары уку йортларында була – бу яшьләрне җәлеп итү өчен мөһим.
Ул шулай ук мәйданчыкларның хәрби корабларда, атом бозваткычларында һәм электростанцияләрдә, тимер юл вокзалларында, аэропортларда һәм космодромнарда булуын билгеләп үтте. Моннан тыш, 11 Россия авиакомпаниясе диктантны очыш вакытында үткәрәчәк. Меңнән артык мәйданчыкны Россиянең Бәйсез профсоюзлар федерациясе оештыра, ә көч ведомстволары гадәттәгечә үз структуралары – хезмәткәрләр, курсантлар, кадетлар һәм аларның гаиләләре өчен ике меңнән артык мәйданчык булдырган. Тагын 7 меңгә якын мәйданчык гражданнар инициативасы белән барлыкка килгән.
2026 елда диктант Маршал Георгий Жуковның тууына 130 ел тулуга багышлана. Шуңа бәйле рәвештә акциянең эмблемасы яңартылган – анда Кызыл мәйданга керү урынында урнаштырылган Маршал статуясы барлыкка килгән. Тестка аның биографиясе, шулай ук башка гаскәр башлыклары, язучылар, артистлар һәм сугышта катнашучылар турында сораулар кертелгән.