Марсель хәзрәт Кәримов: Авыру кеше сабыр итсә, бу аның өчен олы дәрәҗә

Буа мәдрәсәсе җитәкчесе урынбасары, Буаның «Әниләр» мәчете имамы, мәктәптә тарих, җәмгыять белеме, биология, география укытучысы Марсель хәзрәт Кәримов якыннарында акыл белән бәйле авырулары булганнарга киңәш бирде.

«Ислам тәгълиматы буенча, авырулар – күп очракта кәфәрәт (гөнаһларның юылуы) яки сынау. Аллаһы Тәгалә кешегә авыру биреп, аны газапламый. Пәйгамбәребез салләллаһү галәйһи вә сәлләм болай дигән: «Мөэмингә теләсә нинди авыру, кайгы, борчу, хәтта чәнечке кадалып әрнесә дә, Аллаһ шул сәбәпле аның гөнаһларын кичерә» (Бохари). Шулай ук бу сынау булырга мөмкин, үзе өчен генә түгел, хәттә аның якыннары өчен дә», – дип аңлата ул.

Марсель хәзрәт сүзләренчә, авыру кеше сабыр итсә, бу аның өчен олы дәрәҗә. «Әгәр аның акылы алынса, ул «мәҗнүн» (акылдан язган) хөкеменә керә. Шәригатьтә акылдан язган кешедән гыйбадәт (намаз, ураза) төшеп кала. Димәк, бу авыруны Аллаһ «җәза» өчен бирми, бәлки гөнаһлардан чистартып, аны рәхмәте белән каршыларга әзерләү өчен бирә», – ди ул.

• Акыл (интеллект), якыннары авырган кешеләр укый торган догалар һәм башкалар турында Марсель хәзрәт Кәримов белән әңгәмәне тулысынча «Интертат» сайтында укыгыз.