Россия беренчелеге кысаларында Казан илнең иң көчле яшь көрәшчеләрен кабул итәчәк
3-5 апрель көннәрендә Казанның «Ак Барс» Көрәш сараенда көрәш буенча Россия беренчелеге узачак. Турнирда катнашу өчен илнең 40тан артык төбәгеннән гаризалар кабул ителгән. Төбәкләрдә сайлап алу этапларында җиңү яулаган яшь спортчылар өч төркемдә – 13-14, 15-16 һәм 17-18 яшьлекләр арасында бил алышачак. Җиңүчеләр 9 үлчәү авырлыгында ачыкланачак.
Ярышларның тантаналы ачылышында Татарстан Республикасы Спорт министрлыгы, Бөтендөнья татар конгрессы вәкилләре, яшьләр оешмалары җитәкчеләре, төбәк көрәш федерациясе рәисләре һәм танылган спортчылар катнашыр дип көтелә.
«Бу беренчелек халыкара ярышларга әзерлекнең мөһим этабы булып тора. Биредә Россияне дөнья аренасында тәкъдим итәчәк иң көчле яшь спортчылар сайлап алыначак», – дип хәбәр итә оештыручылар.