Россиялеләрне өй янында күгәрченнәр ашаткан өчен штрафлар турында кисәттеләр

Торак йортлар янында күгәрченнәрне ашату административ җаваплылыкка һәм 3 мең сумга кадәр штрафка китерергә мөмкин. Бу хакта юрист Ольга Ошкина белдергән.

Аның сүзләренчә, кошларның күпләп җыелуы санитария нормаларын бозарга, инфекцияләр таралу куркынычы тудырырга, территорияне пычратырга һәм кимерүчеләрне җәлеп итәргә сәләтле. Моннан тыш, күгәрченнәр автомобильләр, эскәмияләр һәм төзекләндерү элементларына зыян китерә ала.

«Россия Административ хокук бозулар кодексының «Әйләнә-тирә мохитне саклау өлкәсендә таләпләрне үтәмәү» маддәсе буенча җыеп алынмаган җим куллану калдыкларын рөхсәтсез тарату дип саналырга мөмкин, моның өчен гражданнарга 3 мең сумга кадәр штраф яный, ә кабат бозган очракта – 5 мең сумга кадәр», - дип билгеләде Ошкина РИА Новости белән әңгәмәдә.

Ул региональ һәм муниципаль дәрәҗәдә өстәмә чикләүләр кертелергә мөмкин, дип өстәде.

«Әгәр хокук бозу системалы характерда булса һәм санитария нормаларын бозса, идарә итүче оешмага, Роспотребнадзорга яки полициягә мөрәҗәгать итәргә мөмкин», - дип ассызыклады юрист.