Песошин һәм Сатретдинов «Закон территориясе» конкурсында җиңүчеләрне бүләкләде
Татарстан Премьер-министры Алексей Песошин һәм Татарстан Республикасы буенча эчке эшләр министры Дамир Сатретдинов «Закон территориясе» конкурсында җиңүчеләрне бүләкләү тантанасында катнашты. Бу хакта ТР Хөкүмәте матбугат хезмәте хәбәр итә.
Бәйге республикада ТР буенча Эчке эшләр министрлыгы тарафыннан 2007 елдан үткәрелә, ә 2012 елдан Татарстан Хөкүмәте химаясендә уза. Аның максаты - җәмәгать тәртибен тәэмин итү, яшьләргә хокукый тәрбия бирү һәм хокук бозуларны профилактикалау өлкәсендә иң яхшы тәҗрибәләрне ачыклау һәм тарату.
Алексей Песошин билгеләп үткәнчә, республикада иҗтимагый иминлек дәрәҗәсе югары булып кала. Аның сүзләренчә, моңа хокук саклау, хакимият органнары, бизнес вәкилләре һәм актив гражданнарның үзара килешеп эшләве ярдәм итә.
Ул искәрткәнчә, бу эштә муниципаль берәмлек җитәкчеләре аерым роль уйный, алар «Имин шәһәр» системасын да кертеп, заманча иминлек технологияләрен финанслауны һәм гамәлгә кертүне тәэмин итә, тәртип саклау буенча җәмәгать пунктларына ярдәм итә һәм хокук саклау органнары хезмәткәрләре эшчәнлеге өчен уңай шартлар тудыра.
Татарстан Премьер-министры хәбәр иткәнчә, республика авыл участоклары өчен заманча административ-торак комплекслардан алып, хокук тәртибенең профессиональ көчләренә актив ярдәм итүче ирекле халык дружиналары системасына кадәр уникаль иминлек инфраструктурасын үстерүне дәвам итә.
Ул шулай ук билгеләп үткәнчә, «Закон территориясе» республика бәйгесе күп еллар дәвамында кирәкле һәм актуаль булып кала. Хөкүмәт башлыгы сүзләренчә, узган ел конкурска муниципаль этапта җиңүчеләрдән 56 гариза килгән.
Быел республика иминлеген тәэмин итүгә сизелерлек өлеш керткән сигез номинациядә иң яхшы катнашучыларга бүләкләр тапшырылды.
Аннары Алексей Песошин «Муниципаль район һәм шәһәр округы территориясендә хокук тәртибен тәэмин итүгә өлеш керткәне өчен» номинациясендә җиңүчеләрне бүләкләде. Казан - беренче, Чаллы - икенче, Кукмара муниципаль районы вәкилләре өченче урынга лаек булды. Моннан тыш, бу номинациядә Лаеш һәм Алабуга районнары башлыкларын билгеләп үттеләр.
Шулай ук конкурс лауреатларына «Авыл җирлеге территориясендә хокук тәртибен тәэмин итүгә керткән өлеше өчен», «Хокук саклау эшчәнлегенә ярдәм итүгә керткән өлеше өчен», «Мәгариф учреждениеләре укучылары арасында хокук бозуларны профилактикалауга керткән өлеше өчен», «Үсеп килүче буынны тәрбияләүгә, яшьләр һәм яшүсмерләрдә җәмгыятьнең хокукый нигезләренә карата хөрмәт формалаштыруга керткән өлеше өчен», «Шәхси сак оешмаларын җәлеп итеп, җәмәгать тәртибен саклауга керткән өлеше өчен», «Җәмәгатьчелекне җәлеп итеп, җәмәгать тәртибен саклауга керткән өлеше өчен» һәм «Балигъ булмаганнарны тәрбияләүдә керткән өлеше өчен» номинацияләрендә бүләкләр тапшырылды.