«Игътибар үзәгендә – кеше»: Казанда легендар Флорид Әгъзамовны искә алдылар
Казан федераль университетының Социаль-фәлсәфи фәннәр һәм массакүләм коммуникацияләр институтында Казан журналистика мәктәбенә нигез салучы, танылган журналист Флорид Әгъзамовның тууына 90 ел тулуга багышланган хәтер кичәсе узды. Чарада гаммәви мәгълүмат чаралары вәкилләре, укытучылар, Флорид Әгъзамовның элеккеге шәкертләре һәм хезмәттәшләре катнашты.
«Флорид Әгъзамов һәрвакыт журналистикада, тормышта кеше – игътибар үзәгендә булырга тиеш, дия иде. Ул шушы фикер өчен көрәште. Укучыларына да журналистиканың игътибар үзәгендә, бернигә дә карамастан, һәрвакыт кеше торырга тиеш, дип өйрәтте. Ә бүген ул – безнең игътибар үзәгендә. Без аны бергәләп искә алабыз», – дип белдерде КФУның журналистика һәм медиакоммуникацияләр югары мәктәбе деканы вазифаларын башкаручы Васил Гарифуллин.
Фото: © «Татар-информ», Владимир Васильев
Флорид Әгъзамовның журналистика мәктәбе өйрәткән кыйммәтләрне аның укучылары әле дә истә тота, файдалана, дип раслады «Казанские ведомости» газетасының баш мөхәррире Венера Якупова.
«Компьютер технологияләреннән һәм гаджетлардан башка да ул һәм аның командасы безгә бик яхшы белем бирде. Укытучыларыбызның безне яратуларын, теләсә кайсы минутта безне якларга әзер булуларын күрдек. Алар һәр студентка шәхес буларак карый иде. Безгә бүгенге көндә дә актуальлеген югалтмаган дәресләр бирделәр. Һәм без «Флорид Әгъзамовның журналистика мәктәбе»нә тугры калабыз», – диде ул.
Фото: © «Татар-информ», Владимир Васильев
Флорид Әгъзамов бүгенге көндә журналистикага тугры булып калган бик күпләрнең язмышында зур роль уйнады, дип искәртеп узды «Татарстан» дәүләт телевидение һәм радиотапшырулар компаниясе директоры Фирдүс Гыймалтдинов. Ул үзенең студент елларын искә алды.
«Минем тормышымда шундый чор булды: укуны бераз ташлап, актив рәвештә иҗат белән шөгыльләнә башладым. Бервакыт Үзәк сайлау комиссиясендә чиратта торганда Флорид абый белән очраштым. Күргәч, куркудан аякларым калтырап китте. Ә ул минем яныма тыныч кына килде дә: «Укырга йөрмисең. Менә күз алдына китер: сине берәр җиргә җитәкче итеп куярга теләрләр, ә дипломың юк. Ул вакытта дипломы булган кешене сайлаячаклар. Шуңа күрә сиңа һичшиксез диплом алырга кирәк. Кил, без сиңа ярдәм итәрбез», – дип әйтте», — дип сөйләде ул.
Ул Флорид Әгъзамовның һәрвакыт «Игътибар үзәгендә – кеше» принцибына таянырга тырышуын искәртте.
«Аның үгет-нәсихәтләре безгә шундый зур йогынты ясады. Бүген бу җансыз цифрлы дөньяда кешелеклелек сыйфатларын саклап калырга омтылуыбыз укытучыбызны үзенчәлекле рәвештә искә алу булсын», – дип билгеләп үтте ул.
Фото: © «Татар-информ», Владимир Васильев
«Ватаным Татарстан» газетасының баш мөхәррире Илназ Фазуллин әлеге форматтагы очрашуларда яшьләр дә катнашырга тиеш дигән фикерен җиткерде. Аның сүзләренчә, галимнең дәресләре, фикерләре киләсе буынга да тапшырылырга тиеш.
«Флорид Әгъзамов күп еллар «Социалистик Татарстан» газетасында эшләгән һәм анда эшләүчеләрнең остазы булган. Безнең редакция аның турында хатирәләрне кадерләп саклый. Аның турында мәгълүматны яшьләргә дә җиткерә алсак, әйбәт булыр иде. Әлеге очрашуда да яшьләр булырга тиеш, киләчәк буынга аның кыйммәтләрен, дәресләрен җиткерү мөһим», – диде ул.
Фото: © «Татар-информ», Владимир Васильев
Галимнең килене Елена Әгъзамова Флорид Әгъзамов исемендәге студентлар премиясен торгызу юнәлешендә эшләве турында хәбәр итте. Моннан тыш, ул Башкортстан республикасы җитәкчелеге белән аның истәлеген әлеге республикада да мәңгеләштерү мөмкинлеген карый.
«Бәлки ул укыган җирдә дә истәлек тактасы урнаштырырбыз. Гомумән, ниндидер истәлекле урын ясарбыз», – диде Елена Әгъзамова.
Фото: © «Татар-информ», Владимир Васильев
Хәтер кичәсе КФУның журналистика һәм медиакоммуникацияләр югары мәктәбендә эшләүче Флорид Әгъзамов исемендәге аудиториядә узды. Чара «Кеше һәм цифрлы киңлек» халыкара медиафорумы кысаларында оештырылган иде.
КФУның журналистика һәм медиакоммуникацияләр югары мәктәбе деканы вазифаларын башкаручы Васил Гарифуллин әлеге форматтагы очрашуларны ел саен уздырырга ниятләүләрен әйтте. Аның сүзләренчә, Флорид Әгъзамовның истәлеген саклау, үткәннәрне искә алу һәм киләчәккә планнар турында сөйләшү Татарстан журналистикасы эшчәнлеге өчен файдалы булачак.