Бакуда Татар милли ашлары көненә багышланган чара узды

1 мартта Татарстан Республикасының Азәрбайҗан Республикасындагы даими вәкиллегендә Бөтендөнья татар милли ашлары көненә багышланган мәдәни чара узган.

Татар милли мәдәни һәм кулинария мирасын саклау, үстерү һәм популярлаштыру, рухи кыйммәтләрне һәм милләтара мәдәни хезмәттәшлекне ныгытуны максат итеп куйган чараны республикадагы «Ак калфак» татар хатын-кызлары җәмгыяте һәм Каюм Насыйри исемендәге мәгариф-мәдәният үзәге оештырган. Бу хакта «Татар-информ»га үзәк җитәкчесе Эльмира Юсифли хәбәр итте.

Тантанада татар җәмәгатьчелеге вәкилләре, мәдәният эшлеклеләре, иҗат коллективлары, уку үзәкләрендә белем алучылар, шулай ук татар халкының милли мәдәнияте һәм гореф-гадәтләре белән кызыксынучы кунаклар катнашкан. Программа кысаларында катнашучыларга татар милли ашлары тарихына һәм традицияләренә, аның милли үзенчәлекне формалаштырудагы һәм татар халкының мәдәни кыйммәтләрен саклаудагы әһәмиятенә багышланган тематик видеоматериал тәкъдим ителгән.

Фото: Эльмира Юсифли

Концерт программасында милли музыкаль сәнгать коллективлары һәм үзешчән башкаручылар чыгыш ясаган. Сәхнәдә «Лалә» һәм «Ак калфак» ансамбльләре, баянчылар дуэты, шулай ук татар халык һәм заманча музыкаль әсәрләрен башкарган җырчылар – Илгар Акчурин һәм Рафаэль Усманов үз осталыкларын күрсәткән. Каюм Насыйри исемендәге үзәкнең яшь шәкертләре татар милли ашларына багышланган шигырьләр укыган.

Чара барышында традицион татар ашларын әзерләү буенча мастер-класслар үткәрелгән. «Ак калфак» җәмгыяте һәм К.Насыйри үзәге вәкилләре коймак пешерү дәресе уздырган һәм кулдан токмач кисү традициясен күрсәткән.

Катнашучылар милли ризыклар әзерләү үзенчәлекләре һәм татар аш-суы традицияләре белән якыннан таныша алган. Чара азагында татар милли ашлары белән чәй эчү оештырылган.