Мөселманнарга ураза тоту урынына ярлыларны ашатырга ярыймы икәнен аңлаттылар
Мөселманнар сәбәпсез уразасын калдыра һәм аның урынына мохтаҗларны ашата алмый. Бу хакта ТР мөселманнары Диния нәзарәте сайтында урнаштырылган фәтвада әйтелә.
Бары тик сәламәтлек хәле сәбәпле ашау һәм эчүдән тыелып тора алмаган мөселманнарга гына ураза тоту урынына мохтаҗларны ашатырга рөхсәт ителә. Бу, мәсәлән, табиб кушканча даими рәвештә дарулар кабул итәргә мәҗбүр булган дин тотучылар.
Әгәр кешенең ураза тотмаска җитди сәбәбе юк икән, ул аны тотарга тиеш. Мохтаҗларны ашатуга килгәндә, ураза тотучыларга ярлыларны ашатырга киңәш ителә, чөнки ул моның өчен зур савап ала.