Әтнә районында агросыйныфлар саны ике тапкырга арткан
Әтнә муниципаль районы башлыгы Рөстәм Хисамиев район советы сессиясендә чыгыш ясаганда авыл хуҗалыгы өлкәсендәге кадрлар кытлыгы мәсьәләсе һәм бу проблеманы хәл итү юллары турында сөйләде.
«Соңгы елларда халык хуҗалыгының һәр өлкәсендә кадрлар кытлыгы бик каты сизелә. Бигрәк тә үзебезнең авыл хуҗалыгы өлкәсе кадрларга мохтаҗлык кичерә», – дип белдерде район җитәкчесе. Аның сүзләренчә, әлеге мәсьәләне хәл итү өчен белгечләр әзерләү чылбырын мәктәп эскәмиясеннән үк башлау зарур.
Районда бу юнәлештә системалы эш алып барыла. Сөйләшү барышында агросыйныфлар челтәре киңәйтелү турындагы саннар да аталды. Әгәр 2023 елда Әтнә районы мәктәпләрендә 12 агросыйныф эшләсә, быелгы уку елында аларның саны 24 булган. Бу күрсәткеч яшь буынны аграр тармак белән кызыксындыру эшенең нәтиҗәлелеген күрсәтә.
Рөстәм Хисамиев шулай ук белем бирү учреждениеләре белән җитештерү тармагы арасындагы элемтәненыгытырга кирәк, дип ассызыклады. Районда Габдулла Тукай исемендәге авыл хуҗалыгы техникумы коллективы белән хуҗалык җитәкчеләре арасындагы хезмәттәшлекне тагын да көчәйтергә планлаштыралар. Моннан тыш, югары квалификацияле белгечләр әзерләү максатыннан Казан дәүләт аграр университеты белән дә тыгыз элемтәләр урнаштырылган.